Khawateen k liye girtay huway baal bohat pareshani ka baais bante hein is liye wo girte balon ko roknay k liye tarah tarah ki jatan k liye tayyar ho jati hein. Dakhli beemariyan, adwiyat ka reaction or ghizai adam tawazun jesay kuch asbab hein jo balon k girne ka sabab bante hein. Dakhli beemariyon mein harmones ya ghudoodo ki be qaidgi balo ki masail ki jar hai. Thyroid gland ki ghair mamooli karkardagi bhi balon k girne mein ahem kirdar ada karti hai. Khawateen ki zindagi mein mukhtalif adwar mein jab harmones ki tabdili aati ha to baal jharne lagte hein or balon ki miqdar kam ho jati hai. Delivery k kuch maah k baad khawateen k baal bhari tadad mein jhar jate hein is liye zaroori ha k balon ki hifazat waqt se pehlay hi kar li jaye ta k balon ki khoobsurti or dilkashi barqarar rahay. Khawateen ko chahiye k wo balon ko zaroorat se ziyada kas kar na bandhein or har waqt balon ko khula rakhan bhi balon k liye nuqsan da hai. Bohat ziyada garam mahol mein balon ko ziyada dair rakhne se bhi balon ki khoobsurti kharab hoti hai. Balon mein hair rolls ka musalsal istamal bhi balon ko nuqsan ki taraf lay jata hai. Balon k sath karakht tarz-e-amal, khusoosan jab inhein kheencha ya phelaya jaye to balon ki bohat bari tadad toot phoot kar shikar ho jati hai. Har baal ki apni 1 umar hoti hai jab us baal ki zindagi khatam ho jati hai or yeh baal gir jata hai to is ki jaga doosra baal lay leta hai. Jab baal girne ki miqdar naye baal ugnay ki miqdar se barh jaye to baal girne ki soorat-e-haal clearly tor par mehsoos honay lagti hai is liye zaroori ho jata hai k balon ki sehat bahal ki jaye ta k naye baal ugnay ki sharah kam na ho jaye ya naye baal ugnay ka amal mutasir na ho.
Khoobsurat nazar aane ki khuwahish har aurat mein hoti hai. Zaman haal mein jism ko khoobsurat rakhne k liye log jitne jatan karte hein wo is baat ki wazeh akasi karte hein k sirf khawateen hi nahi balkay mard bhi apni zahiri khoobsurti or fitness k baray mein bohat hassas hotay hein. Baaz aukat to aesa dikhai deta hai k muashray mein aik doosray say barh kar khoobsurat or purkashish nazar aane ki dor lagi hui hai. majmooi tor par dekha jaye to khoobsurti sirf gori rangat or pur kashish naqoosh ka hi naam nahi balkay in sab say ahem or bunyadi ahmiyat ki hamil cheez hai insan ka mutanasub jism or khoobsurat sarapa. Khali make up kar lenay say jism ka haqeeqi husan ujagar nahi hota balkay asal khoobsurti haseen sarapay ki marhoon minnat hai. Saaf khoon or mazboot paththa bhi khoobsurti mein izafay ka sabab hotay hein jism mein saaf khoon ki munasib miqdar chehray par tazgi or shaguftagi lati hai jab k is k bar aks wo log jin ka khoon saaf nahi hota ya in k jism mein khoon ki kami hoti hai un k chehre zardi mail peelay ho jate hein. Khoon ki kami se chehre ki ronaq khatam ho jati hai or aankhein har waqt thaki thaki dikhai deti hein lehaza koshish karni chahiye k rang gora karne k bajaye majmooi khoobsurti hasil karne ki koshish ki jaye or is silsilay mein mehangi mehangi creams or facial massage par beja raqam zaya karne ki bajaye achi or mutawazan ghiza istamal ki jaye or ba qaidgi se warzish ka ahtimam kiya jaye. Har roz walk karna bhi sehat or khoobsurti ka zamin hota hai aesay mein ghar k qareeb koi lawn ya park na bhi mayassar ho to sehan ya chat par bhi walk ki ja sakti hai bas zaroorat hai to sirf kaam mein ba qaidgi lane ki. 1 warzish jo ghar mein tamam khawateen ba asani kar sakti hein or yeh in k jism ki sakht ko sadol or khoobsurat rakhne mein madadgar sabit ho sakti hein.
